Lítið nýtt í gögnunum frá Ólafi

Lítið sem ekkert nýtt er í þeim gögnum sem Ólafur Ólafsson fjárfestir skilaði til stjórnskipunar- og eftirlitsnefndar Alþingis í gær. Að óbreyttu gengur Ólafur á fund nefndarinnar korter yfir þrjú síðdegis en fundurinn verður opinn fjölmiðlum. 

Gögnin frá Ólafi eru umfangsmikil en heimildir Vísis herma að megnið af þeim séu sömu gögn og skilað var til Ríkisendurskoðunar þegar ummæli Vilhjálms Bjarnasonar í Silfri Egils árið 2006 voru tekin til skoðunar hjá stofnuninni. 

Í kjölfar ummæla Vilhjálms voru Guðmundur Hjaltason og Kristinn Hallgrímsson, framkvæmdastjóri og lögfræðingur Eglu, félags sem stofnað var til að halda um stóran hlut í Búnaðarbankanum, krafðir um gögn í tengslum við kaupin á Búnaðarbanka. Eftir því sem Vísir kemst næst eru það þau gögn sem Ólafur lagði meira og minna fram við nefndina í gærkvöldi. 

Önnur gögn eru meðal annars gögn sem Framkvæmdanefnd um einkavæðingu hafði í tengslum við söluna á Búnaðarbankanum á sínum tíma. 

Nefndarmenn höfðu tæpan sólarhring til að kynna sér gögnin en ljóst er að tvær grímur runnu á þá þar sem nefndarmenn stóðu í þeirri trú að Ólafur hyggðist leggja ný gögn fyrir nefndina sem gætu varpað ljósi á söluna á sínum tíma. 

Eins og fram hefur komið ríkir mikill trúnaður um þau gögn sem til nefndarinnar bárust síðdegis í gær. Nefndarmenn stjórnskipunar- og eftirlitsnefndar tóku sameiginlega ákvörðun um að tjá sig ekki um innihald gagnanna við fjölmiðla fyrr en eftir að fundurinn með Ólafi væri yfirstaðinn. 

Fréttastofa 365 mun í öllum miðlum greina ítarlega frá fundi Ólafs með stjórnskipunar- og eftirlitsnefnd síðar í dag.