Iniesta á líklega aðeins eitt tímabil eftir hjá Barcelona

Miðjumaðurinn magnaði Andres Iniesta virðist gera sér grein fyrir því að næsta tímabil verði líklega hans síðasta í búningi Barcelona.

Þessi 33 ára leikmaður verður samningslaus næsta sumar og miðað við hvernig hlutirnir hafa þróast í vetur er ólíklegt að hann verði lengur en það hjá félaginu.

Iniesta var aðeins 13 sinnum í byrjunarliði Barcelona í vetur og að hluta til þar sem hann var mikið meiddur. Hann á ekki lengur öruggt sæti í liðinu.

„Ég ætla bara að klára minn samning. Ég vil gera það og svo þarf ég að skoða framhaldið,“ sagði Iniesta.

„Það hefur mikið breyst á þessu síðasta tímabili og ég þarf að læra að meta ákveðna hluti. Þegar kemur að því að ég fari þá verður það í góðu á milli mín og félagsins.“