Sigurður Bollason selur átta prósenta hlut í VÍS

Fjárfestingafélagið Grandier ehf., sem er í eigu fjárfestanna Sigurðar Bollasonar og Don McCarthy, hefur selt átta prósenta hlut sinn í tryggingafélaginu VÍS. Þetta kemur fram í flöggun til Kauphallarinnar en viðskiptin fóru fram í gær. Félagið var næst stærsti hluthafi VÍS.

Í flögguninni kemur fram að Grandier hafi verið beinn eigandi að 144 milljónum hluta í VÍS og auk þess verið með opinn framvirkan samning um kaup á 40 milljónum hluta til viðbótar. Félagið hefur gert upp þann samning án þess að því uppgjöri hafi fylgt öflun atkvæðisréttar. Miðað við núverandi gengi var átta prósenta hlutur Grandier metinn á um 2.060 milljónir króna. 



Miklar deilur hafa staðið yfir innan stjórnar og hluthafahóps VÍS í kjölfar þess að Svanhildur Nanna Vigfúsdóttir felldi Herdísi Fjeldsted úr stóli stjórnarformanns eftir aðalfund VÍS í mars síðastliðnum. Þau átök hafa öðrum þræði snúist um ólíkar áherslur annars vegar fulltrúa lífeyrissjóðanna og hins vegar helstu einkafjárfesta félagsins.

 

Tveimur vikum eftir aðalfund sagði Herdís, sem var studd af Lífeyrissjóði verslunarmanna, sig úr stjórn félagsins. Í kjölfarið lét hún hafa það eftir sér að sú ákvörðun hefði verið vegna ágreinings um vinnubrögð og stjórnarhætti og sagði að nýr stjórnarformaður hefði viljað að stjórnin myndi hafa aukna aðkomu að einstökum fjárfestingum félagsins. Svanhildur hefur sagt þær ásakanir „rakalausar“.