Gunnhildur á skotskónum en Vålerenga gleymdi að verjast

Gunnhildur Yrsa Jónsdóttir var á skotskónum þegar Vålerenga tapaði 4-3 fyrir Roa á útivelli í norsku úrvalsdeildinni í fótbolta í dag.

Það var fátt um varnir hjá Vålerenga í fyrri hálfleik en staðan að honum loknum var 4-1, Roa í vil.

Heimakonur komust í 3-0, Gunnhildur minnkaði muninn á 41. mínútu en aðeins mínútu síðar komst Roa aftur þremur mörkum yfir.

Vålerenga skoraði tvö mörk undir lokin en það var ekki nóg. Lokatölur 4-3, Roa í vil.

Gunnhildur Yrsa, sem er fyrirliði Vålerenga, hefur verið iðinn við kolann að undanförnu og skorað þrjú mörk í síðustu sex leikjum liðsins.

Vålerenga siglir lygnan sjó í 7. sæti norsku deildarinnar.