Von á nýjum græjum frá Apple 12. september

Bandaríski tæknirisinn Apple mun kynna nýjustu vörur sínar á sérstökum viðburði þann 12. september næstkomandi. Fastlega er gert ráð fyrir því að iPhone 8 muni líta dagsins ljós á kynningunni.



Þetta kemur fram í umfjöllun wall Street Journal. Þar segir að stefnt sé að því að halda viðburðinn í Steve Jobs-salnum, glænýjum sal við nýjar höfuðstöðvar Apple sem nefndur er eftir Steve Jobs, stofnanda Apple. Það mun þó fara eftir því hvernig vinna við höfuðstöðvarnar gengur, en þær eru í byggingu.

Eins og áður segir er fastlega reiknað með að iPhone 8 verði kynntur til leiks, ásamt uppfærslum á iPhone 7 og iPhone 7 plus.

Iphone 8 hefur verið beðið með mikilli eftirvæntinu en talið er að síminn verði veglegri en fyrri útgáfur af iPhone-símanum. Þá er einnig reiknað með að Apple TV fái uppfærslu auk þess sem að nýjar útgáfur af stýrikerfum Apple fyrir hinar ýmsu græjur verða kynntar.

Venja er er að Apple haldi stórar kynningar í september. Þá er einnig venja að um tíu dagar líði frá því að nýr iPhone er kynntur þangað til að hann kemur í búðir. Óvíst er þó hvenær hægt verður að kaupa nýjan iPhone á Íslandi.