Vísar því á bug að hafa blekkt umsagnaraðila

Hjalti Sigurjón Hauksson segir að Sveinn Eyjólfur Matthíasson og Haraldur Þór Teitsson hafi haft fulla vitneskju um að bréf eða undirskrift sem hann fékk frá þeim yrðu nýttar vegna umsóknar Hjalta um uppreist æru.

Vísir greindi frá því um helgina að Sveinn hafi skrifað undir bréf fyrir Hjalta. Það hafi þó verið á þeim forsendum að Hjalti ætlaði að sækja um vinnu við akstur hjá olíudreifingarfyrirtæki. Hann neitar því að hafa skrifað undir meðmælabréf fyrir Hjalta vegna umsóknar hans um uppreist æru.

Í framhaldinu steig Haraldur, yfirmaður hjá Teiti Jónassyni, fram og sagðist sömuleiðis hafa skrifað meðmæli fyrir Hjalta til að sækja um vinnu. Ekki uppreist æru.

Í samtali við Vísi vísar Hjalti þessu á bug. Aðspurður hvort að Haraldur Þór hafi vitað um tilgang þeirra bréfa sem Hjalti fékk frá honum segir Hjalti að svo hafi verið.

„Hann vissi það alveg,“ segir Hjalti. Það sama hefur hann að segja um undirskrift Sveins Eyjólfs. Hjalti, sem viðurkennt hefur að hafa skrifað tvö af þeim þremur bréfum sem fylgdu umsókn hans um uppreist æru, segir að hann hafi mætt með bréf sem Sveinn átti að skrifa undir. Aðspurður hvort að Sveinn hafi vitað um tilgang bréfsins segir Hjalti að svo hafi verið.

„Nákvæmlega, því að ég var búinn að undirstrika það við hann,“ segir Hjalti. Sveinn starfaði sem yfirmaður hjá Kynnisferðum, nú Reykjavík Excursions, í þrettán ár. Var hann næsti yfirmaður Hjalta þegar hann starfaði hjá Kynnisferðum. 

Sveinn segist hafa skrifað undir meðmælin undir þrýstingi frá yfirmönnum hjá Kynnisferðum. Benedikt Sveinsson, þriðji umsagnaraðili Hjalta, er einn eigenda Kynnisferða.

Segist Hjalti hafa hringt nokkrum sinnum í Svein og að lokum mætt á skrifstofu hans þar sem Sveinn skrifaði undir bréfið.

„Enda fór ég með uppreista æruna um leið og ég fékk hana til þess að sýna honum hana. Í raun og veru vorum við báðir ánægðir með þetta,“ segir Hjalti.

„Þetta var áfangi sem við héldum að væri í lagi. Hann vildi fá mig strax í vinnu.“

Hjalti fékk árið 2004 fimm og hálfs árs fangelsi fyrir að brjóta kynferðislega á stjúpdóttur sinni frá því hún var fimm ára og til sautján ára aldurs.

Aðspurður að því af hverju hann telji að Sveinn Eyjólfur og Haraldur Þór hafi gefið út yfirlýsingar þar sem þeir segjast hafa verið blekktir af Hjalta að hann telji að þeir séu að verja sig.

„Menn eru bara hræddir. Það er búið að taka mig af lífi og þeir vilja ekki væra næstir í gálgann. Ég skil þá vel,“ segir Hjalti. Hann telur að þeir hafi veitt sér hjálparhönd í þeirri trú að um trúnaðargögn væri að ræða.

„Þeir skrifa um þetta í þeirra trú að þetta séu trúnaðarskjöl sem aldrei nokkur maður eigi eftir að lesa nema ráðuneytið og ríkisstjórn,“ segir Hjalti.

Hjalti skilaði einnig inn meðmælabréfi frá Benedikti Sveinssyni, föður Bjarna Benediktssonar, forsætisráðherra. Hafði Hjalti útbúið það bréf til undirskriftar.

Lektor í refsirétti segir að tilefni gæti verið til endurupptöku á ákvörðunum um uppreista æru ef formgallar hafa verið á umsóknum, líkt og Haraldur Þór og Sveinn halda fram. Breytingar á meðmælabréfum gætu talist refsiverðar.

„Ef bréfinu hefur verið breytt eða er tilbúningur frá upphafi er bara um að ræða skjalafals, auk þess sem önnur ákvæði hegningarlaga gætu komið til skoðunar. Þá hlýtur það að liggja beint við að það yrði að skoða hvort ekki ætti að endurupptaka það mál," segir Jón Þór Ólason, lektor við lagadeild Háskóla Íslands.

Haraldur Þór Teitsson segist í Fréttablaðinu í dag íhuga að leita réttar síns. Hann hefur falið lögmanni sínum að óska eftir gögnum frá dómsmálaráðuneytinu varðandi umsókn Hjalta Sigurjóns Haukssonar um uppreist æru.

„Síðan skoðum við framhaldið þegar ég kem heim,“ segir Haraldur í svari við fyrirspurn Fréttablaðsins um hvort hann hyggist kæra það til lögreglu að meðmælabréf í hans nafni hafi verið notað af Hjalta til að sækja um uppreist æru.