„Fyrsti bjórinn daginn eftir partí er ekki góður“

Heimir Hallgrímsson fékk mikla athygli erlendra fjölmiðla á blaðamannafundi íslenska landsliðsins eftir leikinn í kvöld og var meðal annars spurður hvort hann hefði efast um að það væri hægt að endurtaka leikinn eftir ótrúlegt gengi Íslands á EM í Frakklandi 2016 og koma liðinu á HM.

Það tókst í kvöld er Ísland lagði Kósóvó að velli í lokaleik sínum í undankeppni HM 2018 og tryggði sér þar með farseðilinn til Rússlands.

„Fyrsti bjórinn daginn eftir gott partí er erfiður. Hann bragðast ekki jafn vel og fyrsti bjórinn í kvöld,“ sagði hann og uppskar hlátur í salnum.

„Þetta var massíft partí fyrir Ísland á EM í Frakklandi. Svo lentum við í mjög erfiðum riðli í þessari undankeppni, með fjórum liðum sem voru á EM og svo Finnlandi sem er mun betra en styrkleikalistinn sýndi.“

„En á öllum okkar fundum fyrsta árið eftir EM sögðum við ítrekað að velgengni væri ekki áfangastaður heldur stanslaust ferðalag í rétta átt.“

Heimir var einnig spurður hvort að Noregur, sem naut mikillar velgengni á tíunda áratug síðustu aldar en situr nú afar neðarlega á styrkleikalista FIFA, sé Íslandi víti til varnaðar.

„Noregur yfirgaf sitt einkenni og urðu of góðir fyrir það. Við verðum að gæta okkur á því. Við etum ekki verið betri en allir aðrir á öllum sviðum. Við þurfum að velja okkur það sem við erum góðir í.“

„Samfelldni er nauðsynleg fyrir Ísland. Við verðum aldrei eins og Spánn. En ef við getum sammælst um hver við erum og fyrir hvað við stöndum, þá er það lykillinn að okkar velgengni.“