Ólafía Þórunn einu höggi yfir pari fyrir lokahringinn

Ólafía Þórunn Kristinsdóttir lauk þriðja hring sínum á Sime Darby LPGA mótinu í Malasíu í nótt á tveimur höggum yfir pari eða 73 höggum.

Hún er því í 46.sæti fyrir lokahringinn en hún er samtals á einu höggi yfir pari á meðan efstu konur eru á 15 höggum undir pari.

Ólafía fékk þrjá fugla, fimm skolla og tíu pör á þriðja hringnum sem kom í kjölfarið á frábærum öðrum hring þar sem Ólafía lék á fjórum höggum undir pari.

Lokahringurinn hefst í kvöld en ætla má að Ólafía ljúki leik á aðfaranótt sunnudags.