Vilja kvenskörunga í stjórn

Það yrðu vonbrigði beiti Katrín Jakobsdóttir, formaður Vinstri grænna, sér ekki fyrir því að öflugustu kvenskörungar þingsins verði í forystu enda hafi hún nefnt jafnréttismálin sérstaklega þegar henni var veitt umboð til stjórnarmyndunar í síðustu viku. Þetta er mat þingmanna sem hugnast best stjórn frá vinstri til miðju. Auk Katrínar sjálfrar nefna þessir þingmenn Lilju Alfreðsdóttur, Þórhildi Sunnu Ævarsdóttur, Þorgerði Katrínu Gunnarsdóttur og Helgu Völu Helgadóttur.
Logi Einarsson, formaður Samfylkingarinnar hefur lýst því yfir að ekki sé enn fullreynt að mynda stjórn frá vinstri til miðju. Hann hefur rætt bæði við Katrínu og Sigurð Inga eftir að upp úr viðræðum slitnaði og ræðir við aðra forystumenn í dag. Þetta herma heimildir blaðsins. Ekkert talsamband mun hins vegar vera milli formanna Sjálfstæðisflokks og Samfylkingar.
Samkvæmt heimildum Fréttablaðsins mun Katrín leiða formlegar viðræður Sjálfstæðisflokks, Vinstri grænna og Framsóknarflokks ef af þeim verður, gegn því að þingstyrkur Sjálfstæðisflokksins endurspeglist með öðrum hætti í stjórninni. Náist samkomulag milli forystumanna flokkana um þessi atriði, verða málin rædd í þingflokkum. Það ræðst í kjölfar þeirra hvort Katrín getur farið á fund forseta með meirihluta til formlegra viðræðna.
Þeir þingmenn VG sem náðist í í gær segjast bera fullt traust til Katrínar til að leiða viðræður. Í kosningabaráttunni hafi flokkurinn ekki útilokað samstarf við neinn og samstarfið þurfi að ráðast af málefnum.
Sjálfstæðismenn sem Fréttablaðið hefur rætt við segja öll möguleg stjórnarmynstur erfið og í rauninni engan kost sérstaklega góðan. Það þurfi að koma í ljós hvort þessir flokkar sem nú ræðast óformlega við geti komið sér saman um málefnin og það geti orðið flókið. Hins vegar þurfi sú stjórn sem mynduð verður að endurspegla niðurstöðu kosninganna og þá staðreynd að Sjálfstæðisflokkurinn er langstærsti flokkurinn. Gefi flokkurinn frá sér forsætisráðuneytið þurfi stjórnin að endurspegla ólíka stærð flokkanna með öðrum hætti.
Einn viðmælenda blaðsins hafði á orði að stjórn mynduð af þessum flokkum sem aldrei hafi starfað saman í ríkisstjórn áður, gæti þrátt fyrir allt orðið upphaf sögulegra sátta stjórnmálanna í landinu eftir áratug af ólgu og miklum átökum.
Tengdar fréttir

Hvatti Katrínu til að halda umboðinu og ræða við Sjálfstæðisflokkinn
Sigurður Ingi Jóhannsson, formaður Framsóknarflokksins, segist hafa hvatt Katrínu Jakobsdóttur, formann Vinstri grænna, til að halda umboði til stjórnarmyndunar eftir að slitnaði upp úr viðræðum VG, Samfylkingar, Pírata og Framsóknarflokksins.

Deilt um forsæti og stólafjölda
Barátta um völd einkennir nú þreifingar um myndun ríkisstjórnar. Vinstri græn og Sjálfstæðisflokkur gera bæði tilkall til embættis forsætisráðherra og fjöldi ráðherrastóla er Sjálfstæðismönnum mjög hugleikinn.

Formenn vilja að forsetinn gefi þeim meira svigrúm
Ekki liggur fyrir hvort forseti Íslands muni boða leiðtoga stjórnmálaflokkanna á sinn fund í dag til að veita einhverjum þeirra umboð til myndinar ríkisstjórnar.

Katrín stendur frammi fyrir erfiðri ákvörðun um myndun stjórnar
Kostum í stjórnarmyndun hefur fjölgað og fækkað á víxl þá tíu daga sem þreifingar um stjórnarmyndun hafa staðið.

Stjórn Sjálfstæðisflokks, Vinstri grænna og Framsóknar líklegust að mati Brynjars
Myndi hugsanlega draga úr mótmælum og orsaka minni reiði.

Tveir stjórnarkostir líklegri en aðrir
Formaður Sjálfstæðisflokksins segir eðlilegt næsta skref að hann fái umboð til að láta reyna á samstarf við aðra flokka.

Katrín: Allir meðvitaðir um að gera þurfi málamiðlanir ef mynda á starfhæfa ríkisstjórn
Katrín Jakobsdóttir, formaður Vinstri grænna, segir flokkinn vilja taka þátt í ríkisstjórn svo fremi sem þau geti verið sátt við áhrif sín og málefni stjórnarinnar.

Vandséð stjórn án Sjálfstæðisflokksins
Eftir atburði gærdagsins virðist ljóst að meirihlutastjórn verður ekki mynduð án Sjálfstæðisflokks.