Veginum um Súðavíkurhlíð lokað af öryggisástæðum

Af öryggisástæðum hefur verið ákveðið að loka veginum milli Súðavíkur og Ísafjarðar klukkan 23:00 í kvöld. Er þetta gert með tilliti til aðstæðna og veðurspár eftir fund lögreglu með sérfræðingi snjóflóðaeftirlits Veðurstofu Íslands og yfirmanni hjá Vegagerðinni. Aðstæður verða skoðaðar í fyrramálið með tilliti til hvort óhætt verður talið að opna veginn á ný.

Er vegfarendum bent á að fylgjast með nýjustu upplýsingum á Facebook-síðu lögreglunnar á Vestfjörðum, upplýsingasíma Vegagerðarinnar, 1777, ásamt vef hennar, vegagerdin.is.