Fjöldahjálparstöð opnuð í Vík í Mýrdal

Rauði krossinn hefur opnað fjöldahjálparstöð í Vík í Mýrdal. Mjög vont veður er á Suðurlandi og hefur Þjóðvegi 1 verið lokað. Öll gistiúrræði eru full á svæðinu svo íþróttahúsið hefur verið opnað fyrir ferðalanga.

Eins og kom fram á Vísi í dag var veginum undir Eyjafjöllum og yfir Reynisfjall lokað vegna óveðurs. Samkvæmt ábendingu frá veðurfræðingi Vegagerðarinnar hefur blásið talsvert syðst á landinu og í Öræfum. Þar er austan og norðaustan, 18 til 25 metrar á sekúndu,  og slydda eða snjókoma í Öræfum og þar fyrir vestan að Eyjafjöllum. Hálka eða hálkublettir eru á flestum leiðum á Suður- og Vesturlandi.

Áætlað var að opna fjöldahjálparstöðina klukkan 19.30 en nú klukkan 19.20 voru nú þegar um 20 manns komnir á svæðið samkvæmt upplýsingum frá Rauða krossinum.​ Sjálfboðaliðar munu standa vaktina þangað til veðrinu slotar og búa sig undir að þurfa að hafa opið í nótt.