Frábær spilamennska Ólafíu skilaði henni í gegnum niðurskurðinn

Ólafía Þórunn Kristinnsdóttir er að öllum líkindum búin að tryggja sig inn á lokahringinn á Pure Silk mótinu á LPGA-mótaröðunni en hún var rétt í þessu að klára sinn annan hring.

Hún hóf hringinn í gær en þurfti að hætta leik eftir tólf holur vegna myrkurs. Hún hafði fengið fimm skolla á fyrstu ellefu holunum en lauk svo deginum á fugli.

Ólafía hélt uppteknum hætti þegar keppni hófst að nýju í morgun og spilaði frábært golf. Hún náði alls fjórum fuglum á síðustu sex holunum sínum.

Enn eiga nokkrir kylfingar eftir að ljúka keppni en eins og stendur þá er afar líklegt að Ólafíu komist í gegnum niðurskurðinn en niðurskurðarlínan er sem stendur við sex högg yfir pari en Ólafía er á samtals fjórum yfir pari eftir hringina tvo. Hún spilaði annan hringinn á piari.

Lokahringurinn er spilaður í kvöld og er í beinni útsendingu á Stöð 2 Sport 4 klukkan 20:00.