Fyrirtæki með tæplega þúsund milljarða í tekjur gera upp í erlendri mynt

Rúmlega tvö hundruð íslensk fyrirtæki sem gera upp í öðrum gjaldmiðlum en íslensku krónunni greiddu 12,25 prósent af heildarskattgreiðslum árið 2016. Flest félaganna eru eignarhaldsfélög og félög í sjávarútvegi og ferðaþjónustu og er evran vinsælasti erlendi uppgjörs gjaldmiðillinn.

Ýmsar ástæður geta verið fyrir því að fyrirtæki kjósa að færa bókhald sitt í annarri mynt en íslensku krónunni. Oftast er það vegna þess að stór eða stærstur hluti tekna þeirra er í annarri mynt en krónu og þannig losa fyrirtækin sig undan þeim sveiflum sem eru á íslensku krónunni.

Samkvæmt upplýsingum frá Ríkisskattstjóra höfðu 232 félög heimild til að færa bókhald og semja ársreikninga í erlendum gjaldmiðli árið 2016. Af þeim færðu langflest bókhaldið í evrum, eða 121 félag en 91 félag færði bókhald sitt í dollurum en tuttugu fyrirtæki í öðrum myntum.

Í þessum hópi eru stór útgerðarfyrirtæki, flugfélög og álfyrirtæki sem öll velta miklu fé. En heildar rekstrartekjur þeirra fyrirtækja sem gerðu upp í erlendri mynt árið 2016 voru 944 milljarðar króna, eða sem nemur rúmlega einum fjárlögum íslenska ríkisins.

Þessi félög greiddu 10,4 milljarða í tekjuskatt og 10,2 milljarða í tryggingargjald á árinu 2016.

Gjaldmiðilsmálin komu til umræðu á Alþingi í gær í óundirbúinni fyrirspurn Ágústs Ólafs Ágústssonar þingmanns Samfylkingarinnar til Bjarna Benediktssonar fjármálaráðherra.

„Finnst hæstvirtum fjármálaráðherra réttlætanlegt að íslenskur almenningur og þorri íslenskra fyrirtækja þurfi að búa við krónuna og hennar fylgifiska sem eru háir vextir og verðtrygging? Á meðan geta stórfyrirtæki og auðmenn kosið skjól annarra gjaldmiðla á sama tíma og þeir njóta góðs af af háum vöxtum og verðtryggðu fjármagni,“ sagði Ágúst Ólafur.

Flest fyrirtækin gera upp í evru

Langflest félaganna sem gera upp í erlendri mynt, eða 80, eru skráð sem eignarhaldsfélög og getur starfsemi þeirra verið með ýmsum hætti.

Þar á eftir koma 9 fiskvinnslufyrirtæki, 9 hugbúnaðarfyrirtæki og neðar á listanum eru fimm álvinnslufyrirtæki og jafnmörg farþegaflutningafyrirtæki í flugi og síðan koma fyrirtæki í öðrum atvinnugreinum eins og útgerð.

Fjármálaráðherra segir vissulega hægt að taka upp annan gjaldmiðil eða festa krónuna við annan gjaldmiðil en áföll yrðu þá tekin út með auknu atvinnuleysi.

„Þannig að það er alrangt sem háttvirtur þingmaður segir, að það sé verið að níðast á íslenskum almenningi og hinum venjulega íslenska borgara með því að við höldum úti okkar eigin gjaldmiðli. Þvert á móti hefur okkur tekist að koma fólki í skjól, tryggja því atvinnu. Við höfum síðan á grundvelli okkar eigin gjaldmiðils byggt upp framúrskarandi lífskjör,“ sagði Bjarni á Alþingi í gær.

Sé tekið mið af greiðslu tekjuskatts og tryggingargjalds greiddu þau 232 félög sem gera upp í erlendum gjaldmiðli 12,25% af heildarskattgreiðslum lögaðila á Íslandi árið 2016. En það ár voru 42.526 lögaðilar á skattagrunnskrá vegna þess reikningsárs.

Þessi fyrirtæki eru því 0,55 prósent allra skráðra félaga á Íslandi en greiða 12,25 prósent heildarskatta þeirra.