Sigurður Ingi vill leyfa hjónum að eiga sitt hvort lögheimilið

Sigurður Ingi Jóhannsson, samgöngu- og sveitarstjórnarráðherra, hyggst leggja fram frumvarp um breytingar á lögum um lögheimili og aðsetur.

Verði frumvarpið að lögum verður hjónum heimilt að eiga sitt hvort lögheimilið. Þá verður Þjóðskrá Íslands einnig gert að senda tilkynningu til þinglýsts eiganda fasteignar um þá sem skrá lögheimili sitt í fasteign í hans eigu.

Sigurður Ingi greinir frá þessu á Facebook-síðu sinni en þar gerir hann betur grein fyrir máli sínu.

Hann segir að síðastliðinn áratug hafi verið nægjanlegt að tilkynna nýtt lögheimili án þess að eigandi sé endilega upplýstur um að nýr aðili hafi bæst við á heimilið.

Einnig sé orðið algengangara að hjón þurfi vinnu sinnar vegna að vera í fjarbúð og eiga fleiri en eitt heimili af þeim sökum.

Vill Sigurður Ingi breyta þessu með frumvarpinu sem hann ætlar að leggja fram á Alþingi í mars næstkomandi.