Flestar matvörur lækkað talsvert í verði á síðustu tveimur árum

Hagstætt gengi og harðari samkeppni við innflutta vöru skilar lægra matarverði til neytenda og hafa flestar matvörur lækkað talsvert í verði á síðustu tveimur árum fyrir utan mjólkina sem hefur hækkað um ríflega sjö prósent. Verkefnastjóri hjá ASÍ segir að grípa þurfi inn í einokunarstöðu mjólkurframleiðenda. 

Samkvæmt gögnum frá Hagstofunni yfir vísitölu neysluverðs hefur verðlagsþróun á matvörum á síðustu tveimur árum verið með þeim hætti að verð á matvöru hefur í heildina lækkað um 1,9 prósent. Til dæmis hafa Ávextir lækkað um sjö próent, grænmeti um 4,6 próent, kaffi, te og kakó um átta próesent og gosdrykkir og safar hafa lækkað um 1, 6 prósent í verði.

Auður Alfa Ólafsdóttir, verkefnastjóri verðlagseftirlits hjá ASÍ segir stöðuna góða fyrir neytendur:

„Þetta er meiri verðstöðugleiki og betra verð en íslenskir neytendur eru vanir. Mjög góð staða í heildina litið.“ 

Þær vörur sem hafa hækkað eru til dæmis fiskur, um eitt komma tvö prósent - en mjókurvörur hafa hækkað um sjö komma fjögur prósent.

„Á síðustu tveimur árum hefur gengi styrkst mikið og við sjáum að innfluttar vörur hafa lækkað og vörur sem eru í samkeppni við innfluttar vörur en mjólkin er ekki í neinni samkeppni. Við teljum að þetta sé út af því, það er engin samkeppni þannig að þessar vörur geta haldið áfram að hækka,“ segir Auður í samtali við fréttastofu.

Auður segir mjólkina skera sig algjörlega úr í verðlagsþróun:

„Mjólkuriðnaður hefur ekki verið undir sömu lögum og annar iðnaður. Undanskilinn öðrum samkeppnislögum. Þetta þyrfti að skoða. Yrði neytendum í hag.“