Jafnt hjá Íslendingaliðunum

Íslendingaliðin Horsens og Randers mættust í dönsku úrvalsdeildinni í fótbolta í kvöld og skildu jöfn 1-1.

Hannes Þór Halldórsson stóð allan leikinn í marki Randers en Kjartan Henry Finnbogason var ekki í hóp hjá Horsens þar sem hann sat leikbann fyrir uppsafnaðan fjölda gulra spjalda.

Bashkim Kadrii kom gestunum í Randers yfir eftir tæpan hálftíma en Jonas Thorsen jafnaði aðeins tíu mínútum seinna.

Fleiri urðu mörkin ekki og liðin deila stigunum með sér. Randers þurfti þó á þeim öllum að halda því þeir eru í baráttunni á botni deildarinnar á meðan Horsens er í 4. sætinu.