Kötturinn sem stöðvaði leik í Meistaradeildinni

Knattspyrnusamband Evrópu, UEFA, hefur kært tyrkneska félagið Besiktas þar sem köttur komst út á völlinn í leik liðsins í Meistaradeildinni í gær.

Það var á 49. mínútu leiksins sem Michael Oliver dómari stöðvaði leik liðsins gegn Bayern af því það var köttur mættur inn á völlinn. Köttur!! Við höfum séð íkorna meðal annars lauma sér inn á völlinn en köttur sést ekki á hverjum degi í Meistaradeildinni.

Besiktas er kært fyrir slaka umgjörð en ekki er talið ólíklegt að það hafi einhver áhorfandi hreinlega mætt með köttinn með sér á völlinn. Allt mjög eðlilegt við það.

Umgjörðin klikkaði víða hjá Besiktas því áhorfendur gerðust sekir um að kasta hlutum inn á völlinn og svo stóðu þeir í vegi fyrir útgönguleiðum sem er stórhættulegt.

Bayern vann leikinn 3-1 og rimmunni 8-1 samtals. Það var þó kötturinn sem stal senunni.