Þórólfur Júlían leiðir lista Pírata í Reykjanesbæ

Þórólfur Júlían Dagsson varð hlutskarpastur í prófkjöri Pírata í Reykjanesbæ sem lauk um hádegi í dag. Hrafnkell Brimar Hallmundsson lenti í öðru sæti og Margrét Sigrún Þórólfsdóttir í því þriðja. Þórólfur er talsmaður Samtaka andstæðinga stóriðju í Helguvík.

Þórólfur lenti í þriðja sæti í prófkjöri flokksins í Suðurkjördæmi fyrir Alþingiskosningarnar í október í fyrra. Ákvað hann að taka ekki sæti á lista Pírata þá vegna þeirrar niðurstöðu en hann hafði sóst eftir því fysta.

Píratar eiga ekki sæti í bæjarstjórn Reykjanesbæjar en flokkurinn fékk 2,5 prósent atkvæða árið 2014. Alls voru greidd 170 atkvæði í prófkjörinu en fimm voru í framboði.

Niðurstaða prófkjörsins er eftirfarandi:

1. Þórólfur Júlían Dagsson

2. Hrafnkell Brimar Hallmundsson

3. Margrét Sigrún Þórólfsdóttir

4. Guðmundur Arnar Guðmundsson

5. Jón Páll Garðarsson