Oddviti Höfuðborgarlistans vill koma böndum á mengun

Höfuðborgarlistinn, nýtt þverpólitískt stjórnmálaafl í Reykjavík, kynnti í dag framboðslista sinn fyrir komandi sveitarstjórnarkosningar. Björg Kristín Sigþórsdóttir sem mun leiða listann, sagði frambjóðendurna koma úr atvinnulífinu, heilbrigðis-og menntakerfinu og þá sé meðal annars jarðfræðingur og framkvæmdastjóri á listanum. Að sögn Bjargar eru frambjóðendur Höfuðborgarlistans mættir til leiks til að „vinna dagsverkið í Ráðhúsinu“ en í því felst meðal annars að koma böndum á megun.

Ástæðan fyrir því að Höfuðborgarlistinn býður fram er sú að frambjóðendum hefur ekki þótt núverandi borgarstjórn standa sig nægilega vel í ýmsum málum eins og til dæmis umhverfismálum og samgöngumálum.

„Við höfum sent inn tillögur og ábendingar til borgarinnar í hinum ýmsu málum og það hefur ekki gengið og þá bara ákváðum við það að taka þetta í okkar hendur og við ætlum að sjá um þetta sjálf,“ segir Björg í samtali við Vísi.

Vilja koma böndum á mengun

„Ég mun klára þau verkefni sem ég tek að mér, eins og varðandi mengunina. Ég mun vinna þetta dagsverk. Mér finnst það óeðlilegt að í borg á norðurslóðum komi í útvarpsfréttum í hverri viku að fólk megi ekki fara út úr húsi, viðkvæmir, börn og aðrir, mér finnst það ekki í lagi. Það þarf að taka til í þessum garði sem mér finnst mikil órækt í. Það þarf að fara inn í hann og taka til,“ segir Björg sem segir að fólkið á bak við Höfuðborgarlistann vera staðráðið í því að koma böndum á mengunina og sjá almennt betur um hreinsun og þrif.

Vilja halda í unga fólkið

Eitt af aðal stefnumálum flokksins er húsnæðismál unga fólksins. 

„Okkur skilst að það sé að flýja borgina því það er hátt íbúðaverð. Það vantar íbúðir í úthverfunum eins og í Grafarholti og Norðlingaholti þar eru lóðir sem eru ódýrari. Þar er hægt að byggja upp íbúðir fyrir ungt fólk. Við megum alls ekki við því að missa það út úr borginni. Við þurfum að halda í þetta fólk í borginni. Það mun taka við keflinu af okkur.“

Eruði sem sagt ekki fylgjandi þéttingu byggðar?

„Ef stefnan er þannig uppbyggð að hún ýtir öðrum hópi í burtu og sinnir bara einhverjum einum hóp þá er það ekki góð samsetning að okkar mati. Við viljum halda í unga fólkið okkar, það mun byggja þessa borg og taka við. Það er eitt af okkar mikilvægustu málefnum,“ segir Björg sem segir að þétting byggðar þurfi ekki endilega að vera slæm en núverandi stefna fæli ungt fólk frá borginni. Uppbyggingarsvæðin henti unga fólkinu ekki fjárhagslega.

Þú leiðir listann, hvað hefurðu gert hingað til?

„Ég hef mikla reynslu úr atvinnulífinu. Ég hef alist upp í fjölskyldufyrirtæki og rekið mitt eigið fyrirtæki. Ég hef mikla reynslu og er leiðtogi, frumkvöðull og hef margar hugmyndir. Ég er lausnamiðuð og hef kraft sem myndi skila sér í því að klára þau verkefni sem þarf að klára hér í borginni.“

Listinn í heild sinni er hér að neðan.

1              Björg Kristín Sigþórsdóttir

2              Sif Jónsdóttir

3              Snorri Marteinsson

4              Helga María Guðmundsdóttir

5              Kristín Birna Bjarnadóttir

6              Sólrún Lovísa Sveinsdóttir

7              Böðvar Sigurvin Björnsson

8              Sigurjóna Halldóra Frímann

9              Ingveldur Marion Hannesdóttir

10           Jón Gunnar Benjamínsson

11           Valgeir Ólafsson

12           Hanna Hlíf Bjarnadóttir

13           Rakel Ólafsdóttir

14           Jóhanna G. Frímann

15           Tinna Líf Jörgensdóttir

16           Phiangphit Thiphakdi

17           Ögmundur Reykdal

18           Karen Hauksdóttir

19           Árni Freyr Valdimarsson

20           Hrafnhildur Hákonardóttir

21           Bergþór Frímann Sverrisson

22           Edda Júlía Helgadóttir

23           Lára Kristín Jóhannsdóttir

24           Aldís Jana Arnarsdóttir

25           Chelco Sankovik

26           Alda Ólafsdóttir

27           Leó Sankovic

28           Georg Sankovik

29           Jóhanna Ögmundsdóttir

30           Bryndís Þorkelsdóttir

31           Alda Viggósdóttir

32           Valgerður Friðþjófsdóttir

33           Valgerður Aðalsteinsdóttir

34           Ásdís Ögmundsdóttir

35           Kjartan Guðmundsson

36           Tinna Ýr Einisdóttir

37           Ziatko Kriekic

38           Anna Dís Arnarsdóttir

39           Zhitho Habic

40           Jenný Árnadóttir

41           Guðrún Guðjónsdóttir

42           Audjelka Kricic

43           Rut Agnarsdóttir

44           Hafsteinn Þór Hilmarsson

45           Elsa Zankovic

46           Andrés Fr. Andrésson