Ólafía Þórunn á næstversta skorinu á fyrsta hring

Ólafía Þórunn Kristinsdóttir byrjaði skelfilega á Lotte meistaramótinu á LPGA mótaröðinni en það fer fram á Hawaiieyjum.

Ólafía Þórunn lék fyrstu átján holurnar á níu höggum yfir pari og var þetta næstversta skorið hjá keppendum mótsins á fyrsta hring.

Ólafía Þórunn fékk sjö skolla og tapaði þar að auki þremur höggum á einni holu. Hún fékk tvisvar sinnum skolla á þremur holum í röð.

Ólafía Þórunn hóf leik á tíundu holu og var á pari, með einn fugl og einn skolla, eftir sex fyrstu holurnar. Þá fór heldur betur að halla undan færi.

Ólafía fékk sex skolla á næstu sjö holum og endaði síðan á því að tapa þremur höggum á sjöttu holunni. Hún var þar með komin níu högg yfir parið. Ólafía paraði síðustu þrjár holurnar en tókst ekki að bæta skorið sitt.

Lélegasta skorið á fyrsta deginum var +10 og var okkar kona því á næstversta skorinu á fyrsta hring. Hún er í 137. til 141. sæti.

Mótið á Hawaiieyjum er það sjötta á þessu tímabili hjá Ólafíu á sterkustu mótaröð heims í kvennaflokki. Ólafía hefur komist í gegnum niðurskurðinn á tveimur mótum á þessu tímabili og besti árangur hennar er 24. sætið.

Ólafía Þórunn keppti líka á þessu móti á Hawaii í fyrra. Hún lék þá á sjö höggum yfir pari samtals (76-75) og komst ekki í gegnum niðurskurðinn.