Eldsupptök við eldvegg í lagerrými Icewear

Lögreglan hefur lokið vettvangsvinnu í iðnaðarhúsnæðinu við Miðhrauni 4 í Garðabæ. Upptök brunans sem varð þar á fimmtudaginn er við eldvegg í miðrými hússins í lagerrými Icewear.

Þetta kemur fram í tilkynningu frá lögreglunni á höfuðborgarsvæðinu en tæknideild lögreglu ásamt fulltrúum Mannvirkjastofnunnar og slökkviliðsins voru að störfum á vettvangi í dag við rannsókn málsins.

Í tilkynningu segir að ekki sé hægt að veita upplýsingar um hvað varð til þess að kviknaði í húsinu. Framundan er vinna við rannsókn á haldlögðum gögnum.