Ósvífinn og óþekktur saurdólgur gengur laus

„Já, þetta var heldur betur óskemmtilegt,“ segir Erna Margrét Oddsdóttir í veipbúðinni Gryfjunni sem stendur við Veltusund 1 – í hjarta borgarinnar.

Hún birti myndir á Instagramsíðu sinni, heldur ókræsilegar, þar sem getur að líta óþekktan mann sem hefur lagt rasskinnar sínar utan í rúðu verslunarinnar og lætur smúlinn úr afturendanum vaða. Brún spýjan gusast á gluggann. Manninum virðist hafa orðið allverulega brátt í brók – og hefur látið eitthvað í sig það sem þoldi enga bið í iðrum þessa óþekkta saurdólgs.

Atvikið náðist á öryggismyndavél

Mynd Ernu Margrétar hefur vakið mikla athygli og hafa fjölmiðlar á borð við DV og Nútímann stokkið til og sagt af þessu miður kræsilega uppátæki mannsins. En, hann er ófundinn enn og óþekktur.

 

Nei andskotinn... #miðbæjarlífið

A post shared by ernamagga (@ernamagga) on May 27, 2018 at 7:08am PDT

Erna Margrét segir að það hafi orðið uppi fótur og fit þegar þetta uppgötvaðist en sæmilegar myndir náðust af atvikinu í öryggismyndavél Gryfjunnar. Starfsmaður hennar sem kom að ósköpunum var í miklu uppnámi og sendi henni Snapchat-skilaboð:

Hjálp! Hvað á ég að gera? Ég segi upp! Háþrýstidælu strax!

„Þetta var algjör viðbjóður,“ segir Erna Margrét og horfir meðal annars til þess að þau voru nýbúin að þrífa allt vandlega í kringum búðina með háþrýstidælu og voru nýlega búin að skila henni.

Kamar skammt undan

Þau hjá Gryfjunni horfðu svo sér til mikillar furðu á myndbandsupptökur af manninum þar sem hann tekur sér sæmilega góðan tíma, um mínútu, í að horfa í kringum sig, leysa niðrum sig og láta þá vaða. Atvikið gerðist snemma að morgni kosninganætur.

„Engin smá buna sem stendur út úr afturendanum á manninum. Hann kíkir í kringum sig. Það er fólk á ferli, bjart … þetta hefur líkast til verið morguninn. Okkur grunar að hann hafi verið ölvaður því ekki sá hann kamar sem er þarna þremur metrum frá.“

Erna Margrét segist ekki hafa kært manninn, hún vonast bara til þess að hann sjái þetta og skammist sín. „Við erum með hliðarmynd af andlitinu á honum en ég myndi aldrei gera honum það að birta prófílmynd. Nei, ég kannast ekki við kauða. Þetta er maður milli þrítugs og fertugs.“

Systurfélag Gryfjunnar er Gyllti kötturinn, verslun sem er á svipuðum slóðum og þar hafa þau aldrei lent í neinu í líkingu við þetta. Hins vegar háttar svo til með Gryfjuna að hún er að nokkru niðurgrafin og fólk virðist líta svo á að þar sjái enginn til þeirra þegar þau eru komin niður tröppurnar. Þarna hefur fólk kastað af sér þvagi, ælt en þetta er fyrsta skipti sem þau í Gryfjunni fá yfir sig skitugemsa af þessari gráðu.