Suarez skoraði í sigri Úrúgvæ

Úrúgvæ fer til Rússlands með góðan sigur á bakinu enda lentu Úrúgvæar ekki í neinum vandræðum gegn Úsbekistan í nótt.

Úrúgvæ vann leikinn í nótt, 3-0, en hann fór fram í höfuðborg Úrúgvæ, Montevideo.

Staðan var 1-0 í hálfleik en þá lagði Luis Suarez upp mark fyrir Giorgian de Arrascaeta. Suarez komst svo sjálfur á blað á 54. mínútu er hann skoraði úr vítaspyrnu.

Það var svo Jose Maria Gimenez sem skoraði þriðja og síðasta mark heimanna rúmum stundarfjórðungi fyrir leikslok.

Úrúgvæ er í riðli með Rússum, Sádum og Egyptum á HM.