Skagamenn með sigur í Safamýrinni

Skagamenn fóru með sigur af hólmi gegn Fram í Safamýrinni í dag 0-1 en það var Þórður Þorsteinn Þórðarson sem skoraði eina mark leiksins.

 

Fyrir leikinn var ÍA í öðru sæti deildarinnar með 10 stig á með Fram var í fjórða sæti með sjö stig.

 

Leikurinn var jafn til að byrja með og áttu bæði lið sín færi fyrstu mínúturnar en ekkert mark var þó skorað í fyrri hálfleiknum.

 

Skagamenn virtust koma ákveðnir til leiks í seinni hálfleikinn og skilaði það sér á 49. mínútu þegar Bjarki Steinn Bjarkason átti frábæran sprett um kanntinn og lagði boltann snyrtilega inn á teiginn þar sem Þórður Þorsteinn Þórðarson var mættur og setti boltann örugglega í hornið fjær.

 

Frammarar reyndu hvað þeir gátu að jafna leikinn og fengu þeir vítaspyrnu á 68.mínútu þegar Guðmundur Magnússon var felldur inná teig. Guðmundur steig sjálfur á punktinn en lét Árna Snæ í marki ÍA verja frá sér.

 

Nær komst Fram ekki og því voru það Skagamenn sem fóru með sigur af hólmi. Eftir leikinn er ÍA með jafn mörg stig og HK í efsta sæti deildarinnar.