Mikil aukning lögð til á veiðum úr verðmætum stofnum

Hafrannsóknarstofnun leggur til töluverða aukningu á veiðum úr verðmætustu fiskistofnum á næsta fiskveiðiári og munar þar mestu um 40 prósenta aukningu á veiðum á ýsu. Hins vegar er lagt til að minna verði veitt af ýmsum hlýsjávartegundum og Hafrannsóknarstofnun hefur sérstakar áhyggjur af stöðu humarstofnsins.

Hafrannsóknarstofnun kynnti í morgun árlega úttekt sína á ástandi nytjastofna og ráðgjöf fyrir næsta fiskveiðiár. Á grundvelli langtímamarkmiða um sjálfbæra nýtingu er lagt til aflamark fyrir á þriðja tug stofna, sem miðast við varúðarsjónarmið og hámarksnýtingu til lengri tíma litið. Guðmundur Þórðarson sviðsstjóri botnsjávarsviðs Hafrannsóknarstofnunar segir ánægjulegt að hægt sé að leggja til auknar veiðar úr verðmætum stofnum.  

 

„Helstu fréttirnar eru þær að það er lögð til smá aukning í þorski sem er ánægjulegt. Um þrjú prósent. Svo er veruleg aukning í ýsu og ufsa. Fjörtíu prósent í ýsu og þrjátíu prósent í ufsa sem er verulegt. Þannig að við erum mjög ánægð með það,“ segir Guðmundur.

 

Þótt ráðlögð aukning í þorski sé lág í prósentum talið er aukningin 6.865 tonn sem er veruleg verðmætaaukning. Verðmætaaukningin er síðan enn meiri í ýsunni þar sem lagt er til að veiða megi rétt tæplega 58 þúsund tonn og er aukningin 40 prósent milli ára eins og áður segir og Hafrannsóknarstofnun leggur til að veiðar á ufsa verði auknar um tæp 19 þúsund tonn.

 

Aðrir fiskstofnar hafa ekki braggast. Þannig er lagt til að veitt verði mun minna af gullkarfa en á yfirstandandi fiskveiði eða 43.600 tonn sem er 14 prósentum minna. Samkvæmt samkomulagi milli Íslands og Grænlands munu 90% eða 39.240 tonn koma í hlut Íslendinga. Ráðgjöf fyrir grálúðu er óbreytt frá fyrra ári eða 24.150 tonn. Samkvæmt samkomulagi milli Íslands og Grænlands munu um 13.500 tonn koma í hlut Íslendinga.

Humarstofninn að hruni kominn

Samkvæmt rannsóknum Hafrannsóknarstofnunar hefur stofn íslensku sumargotssíldarinnar minnkað ört á undanförnum árum vegna slakrar nýliðunar og frumdýrasýkingar í stofninum. Þannig hafi stofninn minnkað um nær 60% á undanförnum áratug. Ekki sé að vænta mikilla breytinga á stofnstærðinni á næstu árum þar sem árgangar sem séu að koma inn í veiðistofninn séu metnir litlir og sýkingarhlutfall mælist hátt. Samkvæmt aflareglu fyrir síld verði aflamark næsta fiskveiðiárs um 35.186 tonn, sem er 9% lækkun frá yfirstandandi fiskveiðiári.

 

Hafrannsóknarstofnun hefur sérstakar áhyggjur af lélegri nýliðun í humri.

 

„Það er alveg rétt að við höfum þungar áhyggjur af humrinum og hver þróunin er. Við sjáum fram á lækkun á komandi árum og það hefur jafnvel verið nefnt að humarveiðar gætu stöðvast út af þessu,“ segir Guðmundur Þórðarson.