Hélt að Travis Scott væri illa við sig þegar þau hittust fyrst

Athafnakonan og næstum-því-milljarðamæringurinn Kylie Jenner og kærasti hennar, rapparinn Travis Scott, sátu fyrir á forsíðu tímaritsins GQ sem kom út í vikunni. Jenner spurði Scott auk þess spjörunum úr um sjálfa sig í myndbandi sem birt var á Youtube-rás GQ en sá síðarnefndi virðist miskunnugur því sem viðkemur kærustunni.

Á meðal þess sem Jenner spurði Scott út í var snyrtivörulína hennar, húðflúr sem hún hefur fengið sér í gegnum tíðina og þá ræddu þau samlokur með hnetusmjöri og sultu í þaula. Einnig kom í ljós að Scott fann upp á nafni dóttur þeirra, Stormi, en hann var hinsvegar ekki jafn vel að sér í nöfnum á hundum Jenner, sem eru fjórir talsins.

Jenner og Scott hafa verið par í rúmt ár og eignuðust dótturina Stormi í febrúar síðastliðnum eftir leyndardómsfulla meðgöngu. Parið virðist ekki vera með það alveg á hreinu hvar það hittist fyrst en Jenner var þó fullviss um að Scott líkaði illa við sig. Það reyndist augljóslega ekki á rökum reist.

23 spurningar Jenner og Scott má horfa á hér að neðan. Þá má lesa forsíðuviðtal GQ við parið í heild sinni hér.