Segist hafa þurft að heilla mannræningjann upp úr skónum til að sleppa

Breska fyrirsætan Chloe Ayling, sem rænt var í Mílanó á Ítalíu og haldið í gíslingu í sex daga á síðasta ári, segir að hún hafi reynt hvað hún gat til þess að láta mannræningjann falla fyrir sér svo hún gæti sloppið úr prísundinni.

Mannránið vakti mikla athygli á síðasta ári en ræninginn, Lukasz Herba, lokkaði Ayling til Mílanó undir því yfirskyni að hann væri ljósmyndari. Í stað þess að taka af henni myndir sprautaði Herba hana með deyfilyfinu ketamín og rændi henni.

Ayling var meðal annars handjárnuð við kommóðu í svefnherbergi húss í bænum Borgial skammt frá Tórínó þar. Herba var nýverið dæmdur í 16 ára og 9 mánaða fangelsi fyrir mannrán og tilraun til fjárkúgunar.

Samþykkti að deila rúmi með ræningjanum

Í viðtali við BBC lýsir Ayling samskiptum þeirra Herba á meðan hann hélt henni fanginni. Segir Ayling að fyrstu tvo dagana hafi hún verið handjárnuð við kommóðu en að hún hafi losnað við handjárnin eftir að hafa samþykkt að deila rúmi með Herba.

„Því meira sem við töluðum saman, því meiri tengsl fann ég myndast. Þegar ég áttaði mig á því að hann var farinn að kunna vel við mig vissi ég að ég þyrfti að nýta mér það,“ sagði Ayling í viðtali við BBC.

Segir Ayling að hún hafi fyllst hryllingi þegar þau komu í húsið þar sem Herba hélt henni fanginni, eftir að hafa ekið um 200 kílómetra frá Mílanó. Fékk Ayling að dúsa í ferðatösku í skottinu á bíl Herba þangað til komið var að húsinu. Þegar inn var komið sagðist Herba ætla að selja hana í kynlífsþrælkun nema hann fengi 300 þúsund evrur, um 40 milljónir króna.

„Ég trúði öllu sem hann var að segja og efaðist ekki um fyrirætlanir hans í eina sekúndu vegna þess að hann gaf mér svo nákvæm svör við öllum spurningunum sem ég spurði hann,“ sagði Ayling.

Þegar Herba fór hins vegar að spyrja hvort hann mætti kyssa hana og hvort þau gætu átt í sambandi nýtti Ayling tækifærið.

„Þegar ég sá viðbrögð hans við því þegar ég var að tala um að eitthvað gæti gerst á milli okkar í framtíðinni, hann varð spenntur og var alltaf að tala um það, þá áttaði ég mig á því að ég þyrfti að halda því áfram,“ sagði Ayling.

Sáust hlæjandi saman á kaffihúsi í Mílanó

Eftir að Herba áttaði sig á því að hann myndi aldrei fá lausnargjaldið greitt ákvað hann að sleppa henni og ók hann Ayling að skrifstofu ræðismanns Breta í Mílanó. Vitni hafa greint frá því að hafa séð þau hlæjandi saman á kaffihúsi á meðan þau biðu eftir að skrifstofan opnaði og hefur það meðal annars leitt til þess að sumir í Bretlandi efist um sögu Ayling.

Hún segist hins vegar bara hafa verið að halda leikritinu áfram fyrir Herba svo öruggt yrði að hún myndi sleppa frá honum.

„Ég varð að gera allt sem ég gat til þess að láta hann verða ástfanginn af mér,“ sagði Ayling.

Sem fyrr segir var Herba dæmdur í fangelsi vegna málsins en í málsvörn hans kom fram að hann hefði hitt Ayling einu sinni áður en hann rændi henni og í það skipti hefði hann orðið ástfanginn af henni. Þá sagði hann að mannránið og fjölmiðlaumfjöllunin í kringum það hefði átt að verka sem innspýting í fyrirsætuferil Ayling.

Segist hún enn ekki átta sig á því af hverju Herba hafi rænt henni. Miðað við það að Herba hafi gerst Facebook-vinur hennar fyrir tveimur árum telur hún líklegt að hann hafi verið heltekinn af henni.