Veiðimenn á vesturlandi biðja um rigningu

Þetta sumar hefur einkennst af miklum öfgum í vatni og eftir þrálátar rigningar sem settu árnar á flot er nú beðið um rigningu.

Það hefur ekkert rignt í góðann tíma á vesturlandi en það úrkomuleysi er farið að hafa heldur betur áhrif á dragárnar í dölunum og eins árnar sem þurfa reglulegar rigningar í Borgarfirði.  Laxveiðiárnar í dölunum eru orðnar það vatnslitlar að þær eru komnar í grjót eins og það er kallað og sama á við um nokkrar ár í Borgarfirði.  rennslið í Norðurá er til að mynda ekki beysið en þetta getur og hefur mikil áhrif á veiðina enda er ansi erfitt að fá laxinn til að taka í þessum skilyrðum.

Það er ekki mikil breyting á veðri næstu vikuna og ólíklegt að það eigi eftir að rigna nokkuð svo það er ljóst að ástandið á ekki eftir að skána neitt.  Það er þá helst að horfa með bjartsýnum augum á haustið en ef það rignir hressilega í september eins og oft áður getur veiðin í dölunum orðið ævintýralega góð og líklega eru þeir veiðimenn sem eiga bókaða daga t.d. í Laxá í Dölum, Haukadalsá og Fáskrúð farnir að leggjast á bæn og biðja um ríflegar síðsumarsrigningar.