Ekkert bendir til snertingar við taugaeitur í Salisbury

Lögreglan í Bretlandi segir ekkert benda til þess að tveir sem veiktust á veitingastað í bænum Salisbury í gærkvöldi hafi komist í snertingu við taugaeitrið Novichok.

Karl á fimmtugsaldri og kona á fertugsaldri veiktust skyndilega á veitingastaðnum og var svæðið i kring innsiglað vegna þess sem undan hefur gengið í bænum.

Lögreglan var lengi með mikinn viðbúnað eftir að eitrað var fyrir Sergei Skrípal og dóttur hans Júlíu með Novichok í júlí. Þá komst par í snertingu við eitrið í ilmvatnsflösku í sumar og lést ein kona af völdum eitrunarinnar.

Lögregla segir að nú sé ekki um alvarlegt atvik að ræða, en fólkið var flutt á sjúkrahús til aðhlynningar.