Faraldur: 27 ungir fíklar látist það sem af er 2018

„Ég fullyrði að ríkisstjórnin sæti nú á neyðarfundi að ræða þessa óbærilegu dánartíðni ef sjúkdómurinn héti eitthvað annað en fíknsjúkdómur,“ segir Arnþór Jónsson formaður SÁÁ.

Arnþór ritar stuttan pistil á heimasíðu SÁÁ sem hefur vakið nokkra athygli. Þar leggur hann út af kvikmyndinni „Lof mér að falla“, sem Arnþór segir áhrifamikla endursögn á vímuefnaneyslu og sorgleg örlög tveggja stúlkna. En, eitt er bíó annað er dauðans alvara.

Einn deyr á níu daga fresti

„Fíknsjúkómurinn er alvarlegur. Sá sem fær slíka læknisfræðilega greiningu verður að taka niðurstöðunni alvarlega. Óábyrgar raddir í okkar samfélagi sem tala eins og hér sé ekki um sjúkdóm að ræða heldur eitthvað annað, enduróma bæði fordóma og þekkingarleysi.

Það sem af er þessu ári 2018, hafa 27 einstaklingar yngri en 40 ára, með læknisfræðilega greiningu um fíknsjúkdóm, látist hér á landi – með öðrum orðum þá deyr einn yngri en 40 ára á níu daga fresti. Hvað er það sem fólk skilur ekki varðandi sjúkdómsgreininguna?“ spyr Arnþór.

Ég fullyrði að ríkisstjórnin sæti nú á neyðarfundi að ræða þessa óbærilegu dánartíðni ef sjúkdómurinn héti eitthvað annað en fíknsjúkdómur.

Fjöldi sjálfsvíga sem flokka má með þessum hætti er þannig svipaður og í fyrra, ívið meiri, en þá vakti Þórarinn Tyrfingsson, fyrrverandi yfirlæknir á Vogi, athygli á þróuninni. Greindi hann verulega aukningu í sjálfsvígum ungmenna sem eiga við fíknivanda að stríða.

Arnþór segir að heilbrigðisyfirvöld hafi ekki brugðist við alvarlegum ábendingum SÁÁ. Fjármagn til meðferðar sem uppfyllir gæða- og öryggiskröfur Embættis Landlæknis er skorið við nögl. Sjúkrahúsið Vogur gæti lokað 1. október hvert ár þegar búið er að vinna fyrir allan peninginn sem heilbrigðisráðuneytið skammtar.

37 fallið vegna fíknar sinnar

Víst er að þau hjá SÁÁ eru afar ósátt við ný fjárlög og telja stjórnvöld sýna sofandahátt gagnvart hinni miklu vá sem líkja má við faraldur. Þórarinn var í viðtali á útvarpstöðinni K100 og hann tók svo djúpt í árinni að heilbrigðisráðherra beri að segja af sér vegna málsins.

Ein þeirra sem hefur vakið athygli á efni pistils Arnþórs er leikkonan Sólveig Arnardóttir sem segir að ef um farsótt væri að ræða sem leggðist aðallega á ungt fólk, „og það sem af er ári hefðu 37 látist af hennr völdum væri búið að blása til stórkostlegar herferðar til að ráða niðurlögum hennar! Það væri búið að virkja öll þau tæki og tól sem tiltæk eru. Það væri tekið alvarlega,“ segir Sólveig á Facebooksíðu sinni og krefst þess að málið verði tekið föstum tökum.

Fjölmargir hafa tekið undir með henni á þeim vettvangi.

Fullyrt að um faraldur sé að ræða

Annars sem tjáð hefur sig um tengt málefni, sem eru sjálfsvíg ungs fólks, er Birgir Jónsson trymbill í hljómsveitinni DIMMU.

Hann skrifaði kraftmikinn pistil sem farið hefur víða á samfélagsmiðlum og má sjá hér neðar. Birgir talar, líkt og Sólveig, um faraldur.

„Ég ætla ekki einu sinni að reyna að telja saman hvað DIMMA er búin að spila í mörgum jarðaförum eða koma með einum eða öðrum hætti að slíkum athöfnum eftir sjálfsvíg ungs fólks eða krakka sem látist hafa úr ofneyslu, sem er eiginlega það sama. Þetta er agalegt helvíti. Faraldur.“