Margrét nýr forstöðumaður mannauðslausna hjá Advania

Margrét Gunnlaugsdóttir hefur tekið við starfi forstöðumanns mannauðslausna Advania. Hún gegndi áður stöðu forstöðumaður á rekstrarlausnasviði fyrirtækisins. 

Í tilkynningu frá Advania segir að Margrét leiði 42 manna teymi sem annist þróun, þjónustu, ráðgjöf og innleiðingu á lausnunum. Lausnirnar séu tíma- og viðveruskráningakerfi, fræðslu- launa- og mannauðskerfin H3, Bakvörður og Eloomi.

„Margrét hóf störf hjá Advania í apríl sem forstöðumaður á rekstrarlausnasviði. Hún hefur nú tekið við starfi forstöðumanns mannauðslausna af Daða Friðrikssyni sem leiðir sölumál á nýju sviði ráðgjafar og sérlausna.

Margrét starfaði áður sem vöru- og viðskiptaþróunarstjóri hjá Já, sviðsstjóri hjá Wise og rekstrarstjóri tækniþjónustu hjá Íslandsbanka. Hún hefur því víðtæka stjórnunarreynslu í upplýsingatæknigeiranum,“ segir í tilkynningunni.