Mun mæta og svara spurningum þingmanna um ásakanir á hendur Kavanaugh

Christine Blasey Ford, sálfræðiprófessor í Kaliforníu, mun mæta fyrir þingnefnd og svara spurningum þingmanna um ásakanir hennar á hendur Brett Kavanaugh, hæstaréttardómaraefni Donalds Trump Bandaríkjaforseti, um kynferðisofbeldi fyrir um þrjátíu árum.

Ford steig fram undir nafni á dögunum og lýsti því sem hún segir árás Kavanaugh í viðtali við Washington Post. Árásin segir hún að hafi átt sér stað í unglingasamkvæmi í Maryland-ríki snemma á 9. áratug síðustu aldar.

Mun Ford koma fyrir dómsmálanefnd öldungardeildarinnar í næstu viku en hún hafði áður lýst sig reiðubúna til þess að mæta fyrir þingnefndina. Búist er við því að hún muni mæta fyrir nefndina á fimmtudaginn næstkomandi.

Kavanaugh hefur sagt að ekkert sé hæft í ásökunum en ásakanir Ford hafa sett strik í reikninginn fyrir Kavanaugh og Donald Trump, forseta Bandaríkjanna. Bandaríkjaþing metur nú hæfi Kavanaugh til þess að taka sæti í Hæstarétti Bandaríkjanna. Repúblikanar hafa viljað keyra útnefningu hans í gegn en demókratar hafa reynt hvað þeir geta til þess að standa í vegi fyrir því.