Higuain setti tvö í sigri AC Milan

Gonzalo Higuain skoraði tvö mörk í sigri AC Milan á botnliði Chievo í ítölsku úrvalsdeildinni í dag.



AC Milan fékk botnlið Chievo í heimsókn á San Siro í dag og áttu heimamenn ekki í miklum erfiðleikum.



Gonzalo Higuain kom Milan yfir á 27. mínútu og bætti Argentínumaðurinn svo við öðru marki sínu á 34. mínútu.



Giacomo Bonaventura kom Milan í 3-0 á 56. mínútu áður en Sergio Pellissier minnkaði muninn skömmu síðar.



Lengra komst Chievo ekki og lokatölur 3-1.



Milan komst upp í 10. sæti deildarinnar með sigrinum en Chievo situr sem fastast á botninum með -1 stig.



Sampdoria gerði góða ferð til Bergamo þegar þeir unnu Atalanta, 1-0. Lorenzo Tonelli skoraði sigurmark Sampdoria.



Sampdoria er nú komið í 4. sæti en það gefur þátttökurétt í Meistaradeild Evrópu.



Þá vann Lazio góðan heimasigur á Fiorentina, 1-0. Ciro Immobile skoraði eina mark leiksins.



Lazio komst einnig í Meistaradeildarsæti með sigrinum en þeir sitja í 3. sæti.