Lloris spilar gegn Barcelona en Alli og Eriksen verða ekki með

Hugo Lloris kemur inn í byrjunarlið Tottenham gegn Barcelona í Meistaradeild Evrópu annað kvöld. Fimm lykilmenn verða fjarverandi vegna meiðsla.

Lloris hefur verið fjarverandi í síðustu sex leikjum Tottenham vegna meiðsla á læri en hann æfði með liðinu í dag og mun verja markið gegn spænska stórveldinu á morgun.

Christian Eriksen, Jan Vertonghen, Mousa Dembele, Serge Aurier og Dele Alli voru hins vegar allir fjarverandi á æfingu í dag og verða ekki með. Þeir missa einnig allir af leiknum við Cardiff í ensku úrvalsdeildinni á laugardag.

Vertonghen og Dembele meiddust í sigrinum á Huddersfield um síðustu helgi. Alli hefur átt í meiðslavandræðum síðustu misseri líkt og Aurier. Eriksen hefur ekki komið við sögu í síðustu tveimur leikjum Tottenham vegna magaverkja.

Tottenham tapaði fyrir Inter Milan í fyrsta leik vetrarins í Meistaradeild Evrópu og þarf því að ná í stig gegn Barcelona. Leikurinn fer fram á Wembley annað kvöld.