Hættur vegna meiðsla 26 ára gamall

Pétur Júníusson, línumaður Aftureldingar í Olís-deild karla í handbolta, hefur neyðst til þess að leggja skóna á hilluna vegna meiðsla aðeins 26 ára gamall. Þetta kemur fram í fréttatilkynningu frá Mosfellingum.

Þessi svakalega öflugi leikmaður var eitt mesta línumannsefni sem sést hefur hér á landi þegar að hann skaust fram á sjónarsviðið ungur að aldri og var þá líkt við sjálfan Sigfús Sigurðsson.

Þrátt fyrir ungan aldur hefur hann verið í meistaraflokki Afturelding síðan 2008 en hann hefur verið mikið meiddur frá árinu 2016. Hann gat lítið sem ekkert verið með Aftureldingu á síðasta tímabili vegna meiðsla.

Pétur spilaði með yngri landsliðum Íslands og náði þremur leikjum með A-landsliðinu þar sem honum voru ætlaðir stórir hlutir á sínum tíma. Hann var á sínum tíma einn allra öflugasti sóknarmaður deildarinnar og nær óstöðvandi á línunni.

Pétur spilaði tvisvar sinnum til úrslita í Olís-deildinni með Aftureldingu og fór í bikarúrslitin með liðinu árið 2016 en hann var frá vegna meiðsla þegar að liðið varð meistari meistaranna í byrjun síðustu leiktíðar.

„Það er gríðarlegt áfall fyrir okkur að Pétur þurfi að hætta. Hann hefur verið frábær fyrir Afureldingu síðustu ár og lykilmaður innan sem utan vallar. Pétur er frábær félagi og leiðtogi sem hefur leitt liðið hinn síðustu ár. Pétur verður áfram lykilmaður utanvallar hjá okkur í Aftureldingu,“ segir Einar Andri Einarsson, þjálfari Aftureldingar.

Fram kemur í fréttatilkynningu Aftureldinar að Pétri munu alltaf standa opnar dyrnar hjá Aftureldingu og mun áfram starfa í kringum liðið og félagið með tíð og tíma.