Snörp orðaskipti á Alþingi: „Eru þetta viðeigandi ummæli að forsætisráðherra fjarstöddum?“

Til nokkuð snarpra orðaskipta kom á Alþingi í gærkvöldi á milli Steingríms J. Sigfússonar, forseta Alþingis, og Þorgerðar Katrínar Gunnarsdóttur, formanns Viðreisnar, undir liðnum fundarstjórn forseta.

Þorgerður Katrín ítrekaði beiðni sína um að Katrín Jakobsdóttir, forsætisráðherra, yrði við umræðu um veiðigjöld en nýtt frumvarp til veiðigjalda var rætt til miðnættis á þingi í gær.

Forsætisráðherra var ekki við umræðuna í gærkvöldi þar sem hún hafði skyldum að sinna vegna stórrar kvennaráðstefnu sem nú fer fram hér á landi.

Þorgerður Katrín kvaðst hafa fyllsta skilning á því að ráðherrann þyrfti að sinna embættiserindum en lagði áherslu á að hún teldi mikilvægt að Katrín yrði viðstödd áframhaldandi umræðu um veiðigjöld á þingi í dag.

„Það væri mjög gott og mikilvægt fyrir umræðuna ef að forsætisráðherra kæmi hingað og myndi skýra mál sitt og stefnu og sjónarmið í þessu mikilvæga máli þannig að ég óska eftir skýrum svörum frá forseta,“ sagði Þorgerður Katrín.

Þétt dagskrá ráðherra

Þingforseti sagðist vera kunnugt um að forsætisráðherra vissi af því að áhugi væri á að ræða við hana. Dagskrá ráðherra væri hins vegar mjög þétt þessa dagana vegna kvennaráðstefnunnar. Því þyrfti að koma því þannig við að ráðherra fengi tiltekinn tíma til að koma í þingið í umræðu um veiðigjöld og svara spurningum.

„Ég held að við getum ekki ætlast til þess við þessar aðstæður að forsætisráðherra sem er ekki ráðherra málaflokksins og er ekki með þetta mál heldur er hér háttvirtur sjávarútvegs-og landbúnaðarráðherra til staðar í umræðunni og formaður atvinnuveganefndar sem var  með málið á sínu forræði inni í nefnd. Þannig að það er langsótt krafa að ætlast til þess að forsætisráðherra sé hér við alla umræðuna,“ sagði Steingrímur J.

„Alveg ljóst að hæstvirtur forsætisráðherra gefur ekki mikið fyrir leiðir til samvinnu og sátta“

Þorgerður Katrín sagðist virða það vel og tæki undir að það væri mikilvægt að forsætisráðherra sinnti sínum embættiserindum.

„Hitt er það að hér kom bæði innlegg frá hæstvirtum forsætisráðherra í dag sem ég tel rétt og mikilvægt að verði skýrt. Það eru eiginlega að berast nýjar upplýsingar inn í þetta að Vinstri græn vilja ekki að það sé farin sáttaleið í þessu mikilvæga máli. Ég tel að við þurfum að fara yfir það. Það er alveg ljóst að hæstvirtur forsætisráðherra gefur ekki mikið fyrir leiðir til samvinnu og sátta og það þarf að fá betri útskýringu á því,“ sagði Þorgerður Katrín en hér má segja að þingforseta hafi blöskrað þar sem hann hringdi bjöllu sinni og greip fram í fyrir þingmanninum.

„Eru þetta viðeigandi ummæli að forsætisráðherra fjarstöddum undir liðnum fundarstjórn forseta?“ spurði Steingrímur.

Þorgerður reyndi að grípa orðið til baka en komst ekki að þar sem forseti hélt áfram:

„Háttvirtur þingmaður er hér í bullandi pólitík og er að ræða hér um fjarstaddan stjórnmálamann og notar til þess fundarstjórn forseta.“

Ætlaði að kanna hvort að ráðherra gæti verið viðstaddur umræðuna í dag

Þorgerður sagði þá ágætt að fá þetta fordæmi.

„Ég er að reyna að útskýra af hverju ég tel mikilvægt að hæstvirtur forsætisráðherra... ég er búin að undirstrika það að ég sýni því allan skilning að hæstvirtur forsætisráðherra sinni sínum embættisskyldum, ég er ekki að fetta fingur út í það. Það sem ég er að biðja um þá er að hæstvirtum forsætisráðherra verði gefinn tiltekinn tími og ég fagna því ef það verður á morgun ef það hins vegar verður ekki þá óska ég eftir því að það verði tekin afstaða til þess á morgun að fresta umræðunni þangað til að forsætisráðherra getur verið hér og svarað spurningum,“ sagði Þorgerður.

Steingrímur kvaðst þá ætla að hafa samband við Katrínu og kanna hvaða möguleika hún hefði á að vera við umræður um veiðigjöld í dag.

Vísir hefur haft samband við aðstoðarmann Katrínar til að grennslast fyrir um hvort hún verði viðstödd umræðuna og bíður svara varðandi það.