Liðsfélagar Emils steinlágu fyrir Napoli

Íslenski landsliðsmaðurinn Emil Hallfreðsson er meiddur og var ekki í leikmannahópi Frosinone þegar liðið heimsótti Napoli í ítölsku úrvalsdeildinni í dag.

Skemmst er frá því að segja að liðsfélagar Emils áttu ekki roð í sterkt lið heimamanna enda liðin að berjast á sitthvorum enda töflunnar, Frosinone í næstneðsta sæti á meðan Napoli er í næstefsta sæti deildarinnar.

Fór að lokum svo að Napoli vann 4-0 sigur eftir að hafa leitt með tveimur mörkum í leikhléi.

Pólverjarnir Arek Milik (2) og Piotr Zielinski (1) sáu um markaskorun auk Adem Ounas en Napoli er átta stigum á eftir toppliði Juventus. Frosinone hins vegar fimm stigum frá öruggu sæti í deildinni.