Sat föst í lyftu milljarðamærings alla helgina

Aðstoðarkonu bandarísks bankastjóra var í gær bjargað úr lyftu á heimili mannsins á Manhattan í New York. Konan, sem sögð er vera hin 53 ára gamla Marites Fortaliza, steig inn í lyftuna á föstudagskvöld og hafði hún því setið þar föst í rúmlega tvo sólarhringa áður en slökkviliðsmenn komu henni til bjargar í gærmorgun.

Í yfirlýsingu sem fjölskylda konunnar sendi frá sér og vísað er til á vef Associated Press var konunni komið undir læknishendur. Þrátt fyrir að hafa hvorki fengið vott né þurrt alla helgina er Fortaliza sögð ágætlega haldin.

Sem fyrr segir varð óhappið á heimili bankastjóra, Warren Stephens, en konan hefur verið honum og fjölskyldu hans innan handar síðastliðin 18 ár.

Fjölskyldan hafði farið saman í helgarfrí og var því enginn annar á heimilinu þegar Fortaliza festist í lyftunni, á milli annarrar og þriðju hæðar hússins. Þrátt fyrir að tildrög lyftubilunarinnar séu enn til rannsóknar er talið að bankastjórinn hafi trassað að láta umrædda lyftu gangast undir reglubundna skoðun.