Piatek tryggði AC Milan fimmta sigurinn í röð

Pólski framherjinn Krzysztof Piatek tryggði AC Milan sigur á botnliði Chievo í ítölsku úrvalsdeildinni í kvöld. Lokatölur 1-2, Milan í vil.

Þetta var fimmti sigur Milan í deildinni í röð en liðið hefur verið á mikilli siglingu að undanförnu, ekki síst vegna frammistöðu Piatek.

Pólverjinn, sem kom frá Genoa í janúar, hefur nú skorað sex mörk í sjö deildarleikjum fyrir Milan. Alls hefur hann skorað 19 deildarmörk á tímabilinu. Hann er markahæstur í ítölsku deildinni ásamt Cristiano Ronaldo og Fabio Quagliarella.

Milan komst yfir á 31. mínútu í leiknum í kvöld þegar Lucas Biglia skoraði sitt fyrsta mark á tímabilinu. Perparim Hetemaj jafnaði fyrir Chievo tíu mínútum síðar. Staðan í hálfleik var 1-1.

Á 57. mínútu skoraði Piatek sigurmark Milan með skoti af stuttu færi eftir skalla Samu Castillejo.

Milan er í 3. sæti deildarinnar með 51 stig.