Kæra RÚV fyrir að segja að enginn hafi horft á Hringbraut

Hringbraut-Fjölmiðlar ehf. hefur ákveðið að kæra RÚV til fjölmiðlanefndar og Samkeppniseftirlitsins vegna misvísandi upplýsinga sem RÚV sendi fyrirtækjum um sjónvarpsáhorf. Þetta kemur fram í tilkynningu frá Hringbraut en þar segir rangar upplýsingar hafi komið fram um áhorf í áttundu viku ársins 2019 á sjónvarpsstöð Hringbrautar hafi verið 0,0 prósent samkvæmt Gallup.

Hringbraut áréttar að sjónvarpsstöðin tók ekki þátt í mælingum Gallup í áttundu viku ársins. Hringbraut styðst við MMR kannanir sem byggja á svörum yfir þúsund manns í hvert skipti, en í rafrænum mælingum Gallup er stuðst við 300-400 virka mæla.

Kannanir MMR sýna svo ekki verður um villst að áhorf á Hringbraut er aldrei 0,0 prósent. T.d. horfa 52 prósent landsmanna 50 ára og eldri reglulega í hverri viku á sjónvarpsstöð Hringbrautar skv. MMR.

Hringbraut segir að í upplýsingunum sem RÚV sendi út til fyrirtækja var sérstaklega tekið fram að þau gögn sýndu hlutdeild í sjónvarpsáhorfi meðal þeirra stöðva sem mældar eru í ljósvakamælingum Gallup, en ekki annarra ljósvakamiðla. Hringbraut segir það ekki standast skoðun því ljósvakamiðillinn Hringbraut hafi ekki tekið þátt í mælingum Gallup, en var þrátt fyrir það ekki einungis nefndur í gögnunum heldur var þar beinlínis fullyrt að áhorf á stöðina næmi 0,0 prósent.

Misvísandi upplýsingar sem þessar eru til þess fallnar að valda Hringbraut fjárhagslegu tjóni, t.a.m. vegna mögulegrar auglýsingasölu, og þegar gert það að mati forsvarsmanna Hringbrautar. Því sér Hringbraut-Fjölmiðlar ehf. ekki annan kost í stöðunni en að kæra RÚV til fjölmiðlanefndar og Samkeppniseftirlitsins.