Skilningsrík og full samúðar í garð Garlands

Óskarsverðlaunaleikkonan Renée Zellweger las allt sem hún komst yfir um bandarísku leik-og söngkonuna Judy Garland þegar hún undirbjó sig fyrir kvikmyndina Judy þar sem Zellweger túlkar stormasama ævi hennar.

Zellweger segist hafa öðlast djúpstæða virðingu fyrir Garland í undirbúningsferlinu þegar hún gaumgæfði nánar ævi Garlands og þær aðstæður sem hún bjó við.

Garland þarf vart að kynna en hún skaust skyndilega upp á stjörnuhimininn þegar hún lék Dorothy, aðalhlutverkið, í Galdrakarlinum í Oz árið 1939. Hún giftist fimm sinnum um ævina og átti þrjú börn. Garland lést af of stórum skammti þegar hún var aðeins 47 ára árið 1969.

Judy, sem er leikin heimildarmynd um ævi Garlands, kemur út 27. september en Rupert Goold, sem er þekktur fyrir störf á vettvangi leikhússins, fer með leikstjórn.

„Þegar maður öðlast skilning á því hvað raunverulega þarf til að geta lifað af í ákveðnum kringumstæðum þá getur maður ekki annað fundið fyrir samlíðan og virðingu í garð hennar,“ segir Zellweger sem á sér þá von í brjósti að áhorfendur öðlist dýpri skilning á lífi Garlands með kvikmyndinni.

„Og allar þær hindranir hún þurfti að sigrast á á tímum þegar konum leið ekkert endilega eins og þær hefðu vald yfir eigin lífi líkt og við gerum í dag. Þetta sat í mér og ég vona að hún muni hreyfa við fólki eins og hún hefur hreyft við mér“.