Mario Rui tryggði Napoli sigur

Mario Rui tryggði Napoli sigur á SPAL á lokamínútunum í ítalska boltanum í dag.

 

Fyrir leikinn var Napoli í öðru sæti deildarinnar með 73 stig, langt á undan Atalanta í þriðja sætinu og einnig langt á eftir Juventus í fyrsta sætinu og því ekki mikið fyrir leikmenn liðsins að spila um.

 

Það var Allan sem náði forystunni fyrir Napoli á 49. mínútu leiksins. Allt stefndi í sigur Naoli þar til á 84. mínútu þegar SPAL fékk dæmda vítaspyrnu. Á punktinn steig Andrea Petagna og skoraði hann og jafnaði metin fyrir SPAL.

 

Liðsmenn Napoli gáfust þó ekki upp og náðu sigurmarkinu aðeins fjórum mínútum seinna en það var Mario Rui sem skoraði markið.

 

Eftir leikinn er Napoli með 76 stig í öðru sætinu á meðan SPAL er í ellefta sæti með 42 stig.