Endurkoma hjá Aston Villa sem er yfir eftir fyrri leikinn

Aston Villa er 2-1 eftir fyrri leikinn gegn WBA í umspili um laust sæti í ensku úrvalsdeildinni á næstu leiktíð en liðin mættust á Villa Park í dag.

Það byrjaði vel fyrir gestina frá West Bromwich en þeir komust yfir eftir stundarfjórðung. Þá skoraði framherjinn knái Dwight Gayle.

Þannig stóðu leikar allt þangað til stundarfjórðungi fyrir leikslok er Conor Hourihane jafnaði metin. Villa gerði betur og Tammy Abraham skoraði úr vítaspyrnu á 79. mínútu.

Ekki skánaði ástandið fyrir WBA er Gayle fékk sitt annað gula spjald og þar með rautt tveimur mínútum fyrir leikslok. Hann verður því í banni í síðari leiknum.

Liðin mætast á nýjan leik á þriðjuadgskvöldið en í hinni viðureigninni mætast Derby og Leeds. Þau leika fyrsta leikinn í þeirri rimmu síðar í dag.