Útlit fyrir sól og allt að 22 stiga hita

Hæð vestur af landinu mun ráða mestu um veðrið í dag, laugardag einnar stærstu ferðahelgar ársins. Þetta kemur fram í hugleiðingum veðurfræðings á vef Veðurstofunnar.

Víða er útlit fyrir gott veður og eru það fregnir sem gleðja ættu þá Íslendinga sem héldu á hinar ýmsu bæjarhátíðir sem haldnar eru þessa helgina. Hlýjast verður á suðurlandi en þar gæti hitinn náð allt að 22 stigum en á landinu verður hitinn á bilinu 14-22 gráður í sól.

Íbúar á norðaustanverðu landinu munu hins vegar finna fyrr áhrifum lægðar við Jan Mayen sem gerir það að verkum að eitthvað verður af skýjum á himni, án úrkomu þó.

Á morgun verður áfram norðlæg átt og búast má við dálítilli rigningu norðanlands. Hiti verður enn mestur sunnanlands og gæti orðið um eða yfir 20 stig þegar best lætur.