Maðurinn sem slasaðist í flugslysinu á Haukadalsflugvelli úrskurðaður látinn

Maðurinn sem slasaðist í flugslysinu á Haukadalsflugvelli á Rangárvöllum í dag hefur verið úrskurðaður látinn. Þetta staðfestir Garðar Már Garðarsson, varðstjóri lögreglunnar á Suðurlandi.

Flugmaður flugvélarinnar, sem var íslenskur karlmaður á sextugsaldri var úrskurðaður látinn á vettvangi. Unnið er að rannsókn á tildrögum slyssins. Á fimmta tug manna urðu vitni að slysinu samkvæmt heimildum fréttastofu.

Tilkynning barst um að flugvél hafi hlekkst á, í flugtaki þar klukkan 14:23 í dag. Vitnunum var mikið brugðið að sögn starfsmanns Rauða krossins. Rauði krossinn hefur sent áfallateymi á vettvang til að veita fólki aðstoð og áfallahjálp.

Flughátíð fór fram á svæðinu þegar slysið átti sér stað. 

Samkvæmt upplýsingum af vettvangi var flugmaðurinn einn um borð í vélinni en hann slasaðist alvarlega þegar vélin skall til jarðar í flugtaki.

Samkvæmt upplýsingum frá Landhelgisgæslunni fór þyrla gæslunnar í loftið vegna slyssins en var síðar snúið við þar sem ekki var talin þörf á henni.

Þetta er í annað sinn sem flugslys á sér stað á Haukadalsflugvelli á tveimur dögum, en í gær hlekktist flugvél þar á í lendingu. Vélin snerist þá í lendingu og stöðvaðist á hvolfi á jörðu niðri.

Fréttin hefur verið uppfærð.