„Tala með ruddalegum, klámfengnum og niðrandi hætti um samstarfskonur sínar“

Oddný Harðardóttir, þingmaður Samfylkingarinnar og fyrrverandi fjármálaráðherra, virtist ekki hrifin af málsvörn Sigmundar Davíðs Gunnlaugssonar í kvöldfréttum RÚV af pistli hennar að dæma.

„Ef dónar og dusilmenni drekka sig fulla og tala með ruddalegum, klámfengnum og niðrandi hætti um samstarfskonur sínar en einnig um fatlaða og samkynhneigða einstaklinga, eru viðbrögðin við því þá til að koma pólitísku höggi á einhvern sem tók þátt í leiknum?“ spyr Oddný í pistli á Facebook-síðu sinni.

Ummæli sem voru látin falla á Klausturbar í lok nóvember beindust meðal annars að Oddnýju þannig má heyra Gunnar Braga Sveinsson, þingmann Miðflokksins, segja um Oddnýju:

„Oddný er ekkert ágæt, hún er algjör apaköttur. Hún veit ekki neitt, kann ekki neitt, hún getur ekki neitt,“

Sjá nánar: Gunnar Bragi: „Mér dauðbrá þegar ég heyrði þetta“

Sigmundur Davíð Gunnlaugsson, formaður Miðflokksins og fyrrverandi forsætisráðherra, sakaði fulltrúa á Alþingi um að hafa „nýtt glæp“ til að reyna að klekkja á pólitískum andstæðingum þegar forsætisnefnd Alþingis vísaði Klaustursmálinu til siðanefndar.

Sjá nánar: Sigmundur segist hafa verið „meginskotmarkið í þessari aðgerð“

„Staðreyndin er sú að Alþingi setur landsmönnum lög sem það ætlast til að þeir fylgi. Í næsta húsi við þingið eru lög brotin með mjög alvarlegum hætti og í raun mannréttindi um leið og þá sjá ákveðnir þingmenn tækifæri í því að nýta það sem tækifæri til að refsa þolendum brotsins og fara af stað í átta mánaða leiðangur og lenda í vandræðum á hverju stigi,“ segir Sigmundur um Klaustursupptökurnar en Bergþór Ólason og Gunnar Bragi Sveinsson gerðust báðir brotlegir við siðareglur fyrir alþingismenn vegna framgöngu sinnar á Klausturbar í nóvember á síðasta ári.

Oddnýju þótti málsvörn Sigmundar að því er virðist fremur langsótt og spurði hvort sterk viðbrögð væru ekki eðlileg við „slíku virðingarleysi og dónaskap“.

„Sigmundur Davíð tók þátt í „gleðskapnum“ á Klausturbar en telur að siðareglur og túlkun siðanefndar á þeim, snúist um að koma pólitísku höggi á hann sjálfan. Meint skotmark segir hann og skotið geigaði! Ja sveiattan!“

Oddný sagði að Samfylkingin vilji siðareglur fyrir alþingismenn en flokkurinn sé aftur á móti mótfallinn því að kjörnir fulltrúar forsætisnefndar Alþingis geti snúið niðurstöðum siðanefndar á hvolf eins líkt fyrirkomulagið er í núverandi mynd.

„Alþingi þarf að fara yfir allt ferlið; siðareglurnar, siðanefnd og aðkomu forsætisnefndar (sem ég tel að hvergi eigi að koma nálægt). Best væri ef við fengjum aðstoð frá ÖSE (Öryggis- og samvinnustofnunar Evrópu) sem hefur aðstoðað þjóðþing víða um siðareglur og starfsemi siðanefnda.“

Hún sagði að lokum að ekki mætti gefast upp þó að frumraunir kunni að vera umdeildar. Siðareglur setji viðmið og veiti þingmönnum nauðsynlegt aðhald.