Á þriðja tug látnir eftir felli­byl í Kína

Tala látinna hækkar enn vegna Lekima fellibyljarins sem ríður nú yfir Kína. 28 eru látnir og tuttugu annarra er saknað, segja yfirvöld á svæðinu.

Um fimm milljón manns í Zhejiang héraðinu hafa orðið fyrir áhrifum stormsins og meira en milljón hafa þurft að yfirgefa heimili sín.

Sjá einnig: Stærsti fellibylur sem ríður yfir Kína í áraraðir

Lekima náði landi snemma á laugardagsmorgunn í Wenling, sem er staðsett mitt á milli Taívan og Shanghai borgar.

Flestir þeirra sem létu lífið í Wenzhou borg dóu vegna aurskriðu. Veðurfræðingar vöruðu við aukinni hættu á aurskriðum í gær vegna mikilla rigninga í sambland við jarðhræringar en jarðskjálfti reið yfir svæðið á föstudag.