Grunaður um að hafa stýrt skipi undir á­hrifum á­fengis

Lögreglan handtók í gærkvöldi mann sem grunaður er um að hafa stýrt skipi undir áhrifum áfengis. Maðurinn var handtekinn við Ægisgarð og vistaður í fangageymslum lögreglu og er málið nú til rannsóknar.

Klukkan níu í gærkvöldi barst lögreglu tilkynning um ölvaðan mann í verslun í Hlíðahverfi. Maðurinn hafði verið gripinn við þjófnað og réðst í kjölfarið á starfsmenn verslunarinnar. Maðurinn var færður á lögreglustöð til viðtals og var í kjölfarið látinn laus.

Á tíunda tímanum var svo tilkynnt um líkamsárás í Efra-Breiðholti þar sem fjórir til fimm menn réðust á sautján ára dreng og börðu hann með kylfu og belti. Drengurinn var fluttur með sjúkrabíl á slysadeild til aðhlynningar og var móður drengsins gert viðvart um árásina.

Ung kona sem grunuð er um akstur bifreiða undir áhrifum fíkniefna og akstur án ökuréttinda var stöðvuð í Kópavogi eftir að hafa reynt að stinga lögreglu af. Konan hefur ítrekað verið stöðvuð við akstur en hún hefur ekki öðlast ökuréttindi.

Í Árbæ var ekið á unga konu á reiðhjóli sem féll í jörðina eftir áreksturinn og kenndi hún eymsla í læri og mjöðm. Konan var flutt til aðhlynningar á slysadeild.

Þá var tilkynnt um innbrot í bifreiðar með klukkutíma millibili í nótt. Fyrra atvikið átti sér stað á fjórða tímanum þegar ofurölvi maður var handtekinn í Fossvogshverfi eftir að hafa reynt að komast inn í Bifreiðar. Á fimmta tímanum barst svo svipuð tilkynning þar sem búið var að brjótast inn í fjölda bifreiða í miðborginni. Var búið að stela ýmsum munum og fremja skemmdarverk á bílunum. Maður var handtekinn á sjötta tímanum grunaður um innbrotin og hefur lögregla endurheimt þýfið að stórum hluta. Báðir aðilar voru vistaðir í fangageymslum.