Sveiflan allsráðandi næstu daga í borginni

Einleikstónleikar eru ekki daglegt brauð hjá Hilmari Jenssyni gítarleikara en í tilefni Jazzhátíðar Reykjavíkur heldur hann slíka tónleika í kvöld. Þeir hefjast klukkan 21.15 á efri hæð Listasafns Reykjavíkur við Fríkirkjuveg. Tónlistin verður öll frumsamin. „Ég sem töluvert mikið, og hef alltaf gert, þannig að það er af ýmsu að taka,“ segir hann og hefur fulla trú á að kvöldið verði skemmtilegt.

Sveiflan verður allsráðandi næstu daga í borginni. Tónleikar Hilmars eru einir af sex á dagskrá jazzhátíðarinnar í kvöld í Listasafni Íslands, að lokinni setningu hátíðarinnar í Ráðhúsi Reykjavíkur sem hefst klukkan 17.

Hilmar er reyndar ansi upptekinn þessa dagana því hann kennir við þrjá skóla sem allir eru að hefja vetrarstarfið, Menntaskólinn í tónlist, Listaháskólinn og Tónlistarskóli FÍH. „Líf mitt er dálítið upptekið af að púsla saman eigin stundatöflu í kennslunni en ég hef reynt að æfa mig fyrir tónleikana þess á milli.“

Sex ára kveðst Hilmar fyrst hafa tekið upp gítarinn og lært fyrstu gripin hjá föður sínum, Jens Þórissyni augnlækni. „Síðan hófst bara formlegt nám um tólf ára aldurinn og ég hef ekki hætt síðan. Hef spilað með ansi mörgum sveitum þegar allt er talið, það hleypur á einhverjum tugum.“ Hann segir þær hljómsveitir flestar starfa erlendis og með þeim hafi hann farið í tónleikaferðir vítt og breitt bæði um Evrópu og Bandaríkin. „Ég hef ekki verið í mörgum íslenskum sveitum en hins vegar spilað með ótal einstaklingum, flestum sem eitthvað hafa verið í jazzheiminum hér á landi. Mest þó með Skúla Sverrissyni, bassaleikara og tónskáldi.“

Hilmar segir alltaf gaman að vera með sólótónleika en krefjandi líka. „Slík tækifæri koma ekkert oft en þau eru bara kærkomin.“