Sam­komu­lag um stór­fram­kvæmdir í sam­göngum á höfuð­borgar­svæðinu í fæðingu

Sveitarfélög á höfuðborgarsvæðinu meta þessa dagana tillögur frá samgönguráðherra um stórframkvæmdir í umferðarmálum á svæðinu og uppbyggingu borgarlínu.

Fjármálaráðherra segir stjórnvöld nauðbeygð til að breyta allri gjaldtöku á ökutæki og umferð vegna þróunar á gerð ökutækja.

Þingmenn spurðu fjármálaráðherra og samgönguráðherra út í áform um stórframkvæmdir í vegamálum á höfuðborgarsvæðinu og aðkomu ríkisins að almenningssamgöngum þar á Alþingi í dag. Sigmundur Davíð Gunnlaugsson sagði að svo virtist að leggja ætti viðbótargjöld á  íbúa höfuðborgarsvæðisins ofan á fjölbreytt gjöld sem þegar væru lögð á bíleigendur.

„Getur ráðherrann hæstvirtur hugsað sér að fólk verði látið borga gjöld, viðbótargjöld, fyrir að aka um vegi höfuðborgarsvæðisins. Og í öðru lagi getur hæstvirtur ráðherra hugsað sér að slík gjaldtaka renni til fyrirbæris sem kallað er borgarlína,“ spurði formaður Miðflokksins.

„Ég sé ekki bara fyrir mér að við gætum tekið upp ný gjöld heldur sé ég fyrir mér að við séum nauðbeygð til að gjörbreyta allri gjaldtöku af ökutækjum, eldsneyti og samgöngum í landinu. Það er út af orkuskiptunum,“ sagði fjármálaráðherra.  

Lítil sem engin gjöld væru innheimt í dag af rafmagnsbílum til að hvetja til notkunar þeirra og þar með fengi ríkissjóður engar tekjur af þeim.

„Þessir bílar fara um göturnar án þess að leggja nokkuð til vegna þess að þeir fara aldrei á dæluna. Þeim er að fjölga, þeim er að fjölga og þeim er að fjölga næst hraðast í heiminum á Íslandi. Umhverfisvænum bílum og rafmagnsbílum,“ sagði Bjarni.

Hann sagði undanfarnar tvær ríkisstjórnir hafa fengið áskorun frá öllum sveitarfélögunum á höfuðborgarsvæðinu um samtal um almenningssamgöngur. Þar væri verið að ræða nýjan samgönguás um höfuðborgarsvæðið.  Aðalatriðið væri  að það samkomulag sem væri í smíðum væri um stórfellda uppbyggingu í samgöngum á höfðuðborgarsvæðinu til að greiða fyrir umferð.

Gagnrýna skort á samráði

Þingmenn minnihlutans gagnrýna margir meint samráðsleysi ríkisstjórnarinnar við þá um samgöngumál á höfuðborgarsvæðinu. En kynningafundur Sigurðar Inga Jóhannssonar samgönguráðherra fyrir þingmenn svæðisins var blásinn af í fyrradag vegna þess að hann rakst á við þingstörf en áformin voru kynnt sveitarfélögum fyrir um hálfum mánuði og þau funduðu um í dag.

Þorsteinn Víglundsson þingmaður Viðreisnar sagði lítið fara fyrir boðuðu þverpólitísku samráði.

„Er þetta samkomulag eða drög að samkomulagi? Mun meirihlutinn og minnihlutinn hér á þingi hafa einhverja raunverulega aðkomu að þessu máli þegar samkomulag við sveitarfélögin liggur fyrir. Ef það þá næst og ef stjórnarflokkarnir sjálfir ná samkomulagi við sjálfa sig,“ sagði Þorsteinn.

Samgönguráðherra segir þingmenn  hafa komið að málum við gerð samgönguáætlunar í vor. Ferlið hafi verið gagnsætt á samstarfsvettvangi með sveitarfélögum þar sem flokkarnir ættu allir fulltrúa.

„En það hefur ekki staðið á mér að kynna þetta mál fyrir hverjum sem er. Þá vinnu sem er í gangi. En henni er ekki lokið, hún er í gangi og það er ekkert óvænt við það,“ sagði Sigurður Ingi og sakaði Þorstein um að ástunda ímyndarstjórnmál.